മുന്നണികള്‍ തമ്മിലുള്ള വോട്ട് വ്യത്യാസം 3.6 ശതമാനം മാത്രം; നിയമസഭാ തിരഞ്ഞെടുപ്പില്‍ എസ്ഡിപിഐയുടെ മൂന്ന് ലക്ഷത്തോളം വോട്ടുകള്‍ നിര്‍ണായകം

കേരളത്തിലെ തദ്ദേശ തിരഞ്ഞെടുപ്പ് ഫലങ്ങളെ ഒരു ‘യുഡിഎഫ് തരംഗം’ എന്ന് മാധ്യമങ്ങള്‍ വിശേഷിപ്പിക്കുമ്പോഴും വോട്ടുവിഹിതത്തിലെ കൃത്യമായ കണക്കുകള്‍ പരിശോധിച്ചാല്‍ മുന്നണികള്‍ തമ്മിലുള്ള വോട്ട് വ്യത്യാസം വളരെ നേരിയതാണെന്ന് മനസ്സിലാവുന്നു. 42.93% വോട്ട് യുഡിഎഫ് നേടിയപ്പോള്‍ 39.33% വോട്ട് എല്‍ഡിഎഫ് നേടി. 3.6 ശതമാനം മാത്രമാണ് വ്യത്യാസം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കഴിഞ്ഞ തിരഞ്ഞെടുപ്പുകളിലെ ട്രെന്‍ഡ് പരിശോധിച്ചാല്‍, നിയമസഭാ തിരഞ്ഞെടുപ്പുകളില്‍ പലപ്പോഴും ഭരണമാറ്റമുണ്ടാകുന്നത് കേവലം 1% മുതല്‍ 3% വരെ മാത്രം വരുന്ന വോട്ടുകളുടെ വ്യത്യാസത്തിലാണ്. ഈ സാഹചര്യത്തില്‍ ചെറുപാര്‍ട്ടികളുടെ നിലപാട് നിയമസഭാ തിരഞ്ഞെടുപ്പില്‍ നിര്‍ണായകമാവുമെന്നാണ് വിലയിരുത്തല്‍. പി വി അന്‍വര്‍, സികെ ജാനു ഉള്‍പ്പെടെ ഒന്നോ രണ്ടോ മണ്ഡലങ്ങളില്‍ സ്വാധീനമുള്ളവരെ പോലും ഒപ്പം കൂട്ടാന്‍ യുഡിഎഫ് തയ്യാറാവുന്നത് ഈ യാഥാര്‍ത്ഥ്യം മനസ്സിലാക്കിയാണ്.

ഇവിടെയാണ് തദ്ദേശ തെരഞ്ഞെടുപ്പില്‍ കേവലം 1500 സീറ്റില്‍ താഴെ മത്സരിച്ച എസ്ഡിപിഐ നേടിയ 3 ലക്ഷം വോട്ടുകള്‍ നിര്‍ണ്ണായകമായി മാറുന്നത്. മുന്നണികള്‍ തമ്മിലുള്ള വോട്ടുകളുടെ ചെറിയ ‘ഗ്യാപ്പ്’ നികത്താന്‍ ഈ വോട്ടുകള്‍ക്ക് സാധിക്കുമെന്നാണ് വിലയിരുത്തുന്നത്.

കേരളത്തിലെ 140 നിയമസഭാ മണ്ഡലങ്ങളില്‍ 40-ഓളം ഇടങ്ങളില്‍ ജയപരാജയങ്ങള്‍ നിശ്ചയിക്കപ്പെടുന്നത് 2,000-ത്തില്‍ താഴെ വോട്ടുകള്‍ക്കാണ്. ഒരു മണ്ഡലത്തില്‍ ശരാശരി 2,000 മുതല്‍ 5,000 വരെ വോട്ടുകള്‍ എസ്ഡിപിഐക്കുണ്ടെങ്കില്‍, ആ വോട്ടുകള്‍ മുന്നണി സ്ഥാനാര്‍ഥികളുടെ വിജയസാധ്യതയെ ബാധിക്കും. എസ്ഡിപിഐയുടെ ഈ വോട്ടുകള്‍ ചിതറിക്കിടക്കുന്നതല്ല, മറിച്ച് കൃത്യമായ പോക്കറ്റുകളില്‍ കേന്ദ്രീകരിക്കപ്പെട്ടതാണ്. ഇത് വോട്ടു വിഹിതത്തേക്കാള്‍ ഉപരിയായി ‘സീറ്റുകളുടെ എണ്ണത്തെ’ നേരിട്ട് സ്വാധീനിക്കുമെന്ന് എസ്ഡിപിഐ എറണാകുളം ജില്ലാ പ്രസിഡന്റ് അജ്മല്‍ കെ മുജീബ് ചൂണ്ടിക്കാട്ടി.

തദ്ദേശ തിരഞ്ഞെടുപ്പില്‍ 100-ലധികം വാര്‍ഡുകളില്‍ എസ്ഡിപിഐ നേരിട്ട് വിജയിക്കുകയും, മുന്നൂറോളം വാര്‍ഡുകളില്‍ രണ്ടാം സ്ഥാനത്തെത്തുകയും ചെയ്തു. പല വാര്‍ഡുകളിലും യുഡിഎഫിന്റെയും എല്‍ഡിഎഫിന്റെയും വിജയത്തേക്കാള്‍ കൂടുതല്‍ വോട്ടുകള്‍ എസ്ഡിപിഐ ഒറ്റയ്ക്ക് നേടിയിട്ടുണ്ട്.

കേരളത്തിലെ 140 നിയമസഭാ മണ്ഡലങ്ങളില്‍ 40-ഓളം സീറ്റുകളില്‍ കഴിഞ്ഞ തവണ ഭൂരിപക്ഷം 5,000-ത്തിന് താഴെയായിരുന്നു.
തദ്ദേശ തലത്തില്‍ 3 ലക്ഷം വോട്ടുകള്‍ മാത്രമെടുത്താല്‍ ശരാശരി ഒരു നിയമസഭാ മണ്ഡലത്തില്‍ 2,000 മുതല്‍ 4,000 വരെ ഉറച്ച വോട്ടുകള്‍ എന്നാണ് അര്‍ത്ഥം. ഈ സംഖ്യ ഒരു സ്ഥാനാര്‍ത്ഥിയെ തോല്‍പ്പിക്കാനോ വിജയിപ്പിക്കാനോ കൃത്യമായി മതിയാകും. മാധ്യമങ്ങള്‍ പറയുന്ന ‘തരംഗങ്ങള്‍’ക്കപ്പുറം ഗ്രൗണ്ട് ലെവലില്‍ വോട്ടുകള്‍ നിയന്ത്രിക്കാന്‍ എസ്ഡിപിഐക്ക് സാധിക്കുമെന്നും അജ്മല്‍ കെ മുജീബ് ചൂണ്ടിക്കാട്ടി.