‘ജയ് ​ശ്രീറാം’ വിളിക്കാനാവശ്യപ്പെട്ട്​ ഹിന്ദുത്വവാദികൾ മർദിച്ചെന്ന്​ മുസ്​ലിം യുവാവിന്റെ പരാതി

മുംബൈ: ട്രെയിനിൽ വച്ചും വീടിനടുത്തു വച്ചും ‘ജയ് ​ശ്രീറാം’ വിളിക്കാൻ ആവശ്യപ്പെട്ട്​ ഹിന്ദുത്വവാദികൾ തന്നെയും കുടുംബത്തെയും ആക്രമിച്ചതായി മുസ്​ലിം യുവാവിന്റെ പരാതി. മഹാരാഷ്ട്രയിലെ കങ്കവലി സ്വദേശി ആസിഫ്​ ശൈഖാണ് പരാതിയുമായി രം​ഗത്തെത്തിയത്. രണ്ടു തവണ പരാതി നൽകിയിട്ടും പൊലീസ് നടപടി സ്വീകരിച്ചില്ലെന്നും എന്നാൽ,​ ആക്രമിച്ചവരുടെ പരാതിയിൽ തനിക്കെതിരെ രണ്ടു തവണ കേസെടുത്തെന്നും ആസിഫ് ആരോപിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ജനുവരി 19ന്​ കങ്കവലിയിൽ നിന്ന്​ ഭാര്യക്കും മകൾക്കുമൊപ്പം മുംബൈക്കു​ വരുമ്പോഴാണ്​ ആദ്യ സംഭവം. ട്രെയിനിൽ ഇവർ യാത്ര ചെയ്ത കമ്പാർട്ട്മെന്റിലുണ്ടായിരുന്ന 30ഓളം വിദ്യാർഥികൾ യാത്രക്കാരോട്​ ‘ജയ് ​ശ്രീറാം’ വിളിക്കാൻ ആവശ്യപ്പെട്ടു. പർദ ധരിച്ച തന്റെ ഭാര്യയോടും ആവശ്യപ്പെട്ടു. ഇത്​ ചോദ്യം ചെയ്തതിന്​ വിദ്യാർഥികൾ മർദിക്കുകയായിരുന്നു.

മകളുടെ ദേഹത്ത്​ ചൂടുള്ള ചായ ഒഴിച്ചതോടെ പൻവേൽ റെയിൽവേ പൊലീസിൽ പരാതി നൽകി. എന്നാൽ, കേസെടുത്തില്ല. മോശമായി പെരുമാറിയെന്നാരോപിച്ച്​ അക്രമികളുടെ കൂട്ടത്തിലെ സ്ത്രീ നൽകിയ പരാതിയിൽ തനിക്കെതിരെ കേസെടുക്കുകയും ചെയ്തു.

പിന്നീട്​ കേസ്​ കങ്കവലി സ്റ്റേഷനിലേക്കു​ മാറ്റി. ജനുവരി 24ന്​ അവിടെ ചെല്ലാനും പൻവേൽ റെയിൽവേ പൊലീസ്​ ആവശ്യപ്പെട്ടു. കങ്കവലി പൊലീസ്​ സ്റ്റേഷനിലെത്തിയപ്പോൾ അവിടെ ആളുകൾ തടിച്ചുകൂടിയിരുന്നു. സ്റ്റേഷനിൽ കാത്തുനിന്ന ബിജെപി നേതാവ്​ പരാതി പിൻവലിക്കാൻ ആവശ്യപ്പെടുകയും ഭീഷണിപ്പെടുത്തുകയും ചെയ്തു. അവിടെ നിന്ന്​ പൊലീസാണ്​ വീട്ടിൽ കൊണ്ടുവിട്ടത്​. വീടിനു മുന്നിലും ആളുകൾ കൂടിയിരുന്നു.