മെസ്സിക്കെതിരേ റൊണാള്‍ഡോ; മേജര്‍ ലീഗ് സോക്കറിനേക്കാള്‍ മികച്ചത് സൗദി പ്രോ ലീഗ്

ഫ്‌ളോറിഡ: അമേരിക്കന്‍ മേജര്‍ ലീഗ് സോക്കറിനേക്കാള്‍ (എം.എല്‍.എസ്) മികച്ചത് സൗദി പ്രോ ലീഗാണെന്ന് സൗദി അല്‍ നസ്‌റിന്റെ പോര്‍ച്ചുഗീസ് സൂപ്പര്‍ താരം ക്രിസ്റ്റ്യാനോ റൊണാള്‍ഡോ. പാരിസ് സെന്റ് ജര്‍മെയിനില്‍നിന്ന് (പി.എസ്.ജി) മേജര്‍ ലീഗ് സോക്കറിലെ ഇന്റര്‍ മയാമിയിലേക്ക് ചേക്കേറിയ ലയണല്‍ മെസ്സിയെ കഴിഞ്ഞ ദിവസം ക്ലബ് ആരാധകര്‍ക്ക് മുമ്പില്‍ അവതരിപ്പിച്ചതിന് പിന്നാലെയാണ് റൊണാള്‍ഡോയുടെ ഒളിയമ്പ്. ഞായറാഴ്ച 20,000ത്തിലധികം കാണികളാണ് മെസ്സിയെയും ബാഴ്‌സലോണയിലെ മുന്‍ സഹതാരം സെര്‍ജിയോ ബുസ്‌കറ്റ്‌സിനെയും അവതരിപ്പിക്കുന്ന ചടങ്ങിനെത്തിയത്. ഇരുവര്‍ക്കും 2025 വരെയാണ് കരാര്‍. മെസ്സിയും സൗദി പ്രോ ലീഗിലെത്തുമെന്ന് റിപ്പോര്‍ട്ടുണ്ടായിരുന്നെങ്കിലും ആരാധകരെ അമ്പരപ്പിച്ച് താരം ഇന്റര്‍ മയാമിയുമായി കരാറിലെത്തുകയായിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സെല്‍റ്റ വിഗോക്കെതിരായ അല്‍ നസ്റിന്റെ പ്രീ-സീസണ്‍ സൗഹൃദ മത്സരത്തിന് ശേഷം മാധ്യമങ്ങളോട് സംസാരിക്കുന്നതിനിടെയാണ് മേജര്‍ ലീഗ് സോക്കറിനേക്കാള്‍ മികച്ച ലീഗാണ് സൗദിയുടേതെന്ന് ക്രിസ്റ്റ്യാനോ അവകാശപ്പെട്ടത്. ഭാവിയില്‍ എം.എല്‍.എസിലേക്ക് മാറുമോ എന്ന ചോദ്യത്തോട് പ്രതികരിക്കുകയായിരുന്നു താരം. അമേരിക്കയിലേക്കെന്നല്ല ഇനി യൂറോപ്യന്‍ ക്ലബിലേക്കും പോവില്ലെന്നാണ് ക്രിസ്റ്റ്യാനോ പറയുന്നത്. ‘ഞാന്‍ സൗദി ലീഗിലേക്കുള്ള വഴി തുറന്നു. ഇപ്പോള്‍ എല്ലാ കളിക്കാരും അങ്ങോട്ട് വരുന്നു. എനിക്ക് 38 വയസ്സായി. മറ്റൊരു യൂറോപ്യന്‍ ക്ലബിനും വേണ്ടി ഞാനിനി കളിക്കില്ലെന്നത് നൂറ് ശതമാനം ഉറപ്പാണ്. യൂറോപ്യന്‍ ഫുട്ബാളിന് നിലവാരം നഷ്ടപ്പെട്ടു. ഇംഗ്ലീഷ് പ്രീമിയര്‍ ലീഗിന് മാത്രമാണ് യൂറോപ്പില്‍ നിലവാരമുള്ളത്. മറ്റേതിനേക്കാളും ഉയര്‍ന്ന നിലവാരം പ്രീമിയര്‍ ലീഗിനുണ്ട്. അത്രയും നിലവാരം സ്പാനിഷ് ലീഗിനില്ല. പോര്‍ച്ചുഗീസ് ലീഗ് മികച്ചതെങ്കിലും വേണ്ടത്ര നിലവാരമില്ല. ജര്‍മന്‍ ലീഗും ഇതില്‍നിന്ന് വ്യത്യസ്തമല്ല’, എന്നിങ്ങനെയായിരുന്നു റൊണാള്‍ഡോയുടെ വാക്കുകള്‍.

കഴിഞ്ഞ സീസണില്‍ മാഞ്ചസ്റ്റര്‍ യുനൈറ്റഡ് വിട്ടാണ് ക്രിസ്റ്റ്യാനോ സൗദിയിലെ മുന്‍നിര ക്ലബുകളിലൊന്നായ അല്‍ നസ്റിലേക്ക് ചേക്കേറിയത്. റൊണാള്‍ഡോയുടെ വരവിന് പിന്നാലെ വന്‍ താരനിരയാണ് സൗദി പ്രോ ലീഗിലേക്ക് എത്തിയത്. യൂറോപ്യന്‍ ഫുട്ബാളില്‍നിന്ന് കരീം ബെന്‍സേമ, റൂബെന്‍ നെവസ്, എന്‍ഗോളോ കാന്റെ, റോബര്‍ട്ടോ ഫിര്‍മിനോ, മാഴ്സെലോ ബ്രോസോവിച്ച് തുടങ്ങിയവര്‍ അവിടെയെത്തി.

അതേസമയം, പ്രീസീസണ്‍ മത്സരത്തില്‍ അല്‍ നസര്‍ എതിരില്ലാത്ത അഞ്ച് ഗോളിന് സെല്‍റ്റ വിഗോയോട് തോറ്റിരുന്നു. വ്യാഴാഴ്ച നടക്കുന്ന മറ്റൊരു മത്സരത്തില്‍ അല്‍ നസ്ര് പോര്‍ച്ചുഗീസ് ചാമ്പ്യന്മാരായ ബെന്‍ഫിക്കയെ നേരിടും.