കഴുത്ത് ഞെരിച്ചു, പീഡിപ്പിച്ചു, കൊള്ളയടിച്ചു: ഐആര്‍എസ് ഉദ്യോഗസ്ഥന്റെ വീട്ടില്‍ അരങ്ങേറിയത് ഒരു മണിക്കൂര്‍ നീണ്ട ക്രൂരത

ന്യൂഡല്‍ഹി: ഡല്‍ഹിയില്‍ മുതിര്‍ന്ന ഐആര്‍എസ് (IRS) ഉദ്യോഗസ്ഥന്റെ മകളെ ബലാത്സംഗം ചെയ്ത് കൊലപ്പെടുത്തിയ കേസില്‍ ഞെട്ടിക്കുന്ന വിവരങ്ങള്‍ പുറത്ത്. ബുധനാഴ്ച രാവിലെ നടന്ന ക്രൂരകൃത്യത്തിന് പിന്നില്‍ ആ കുടുംബത്തിന്റെ ദിനചര്യകള്‍ കൃത്യമായി അറിയാവുന്ന മുന്‍ ജീവനക്കാരനായ രാഹുല്‍ മീണ (19) ആണെന്ന് പോലീസ് സ്ഥിരീകരിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അടുത്തിടെ ജോലിയില്‍ നിന്ന് പിരിച്ചുവിട്ട മീണ, കുടുംബത്തിന്റെ ശീലങ്ങള്‍ മനസ്സിലാക്കിയാണ് കൃത്യം ആസൂത്രണം ചെയ്തത്.

കൊലപാതകത്തിലേക്ക് നയിച്ച വഴി

അല്‍വാറില്‍ വെച്ച് ഒരു സുഹൃത്തിന്റെ ഭാര്യയെ പീഡിപ്പിച്ച ശേഷം മൊബൈല്‍ ഫോണ്‍ വിറ്റ് കിട്ടിയ പണവുമായി ടാക്‌സി വിളിച്ച് ബുധനാഴ്ച പുലര്‍ച്ചെയാണ് മീണ ഡല്‍ഹിയിലെത്തിയത്. രാവിലെ ആറരയോടെ ഇയാള്‍ ഉദ്യോഗസ്ഥന്റെ വീടിന് മുന്നിലെത്തി. വീട്ടുകാര്‍ ജിമ്മില്‍ പോകുന്ന സമയമാണിതെന്ന് ഇയാള്‍ക്ക് അറിയാമായിരുന്നു. ജീവനക്കാര്‍ക്ക് ഉപയോഗിക്കാനായി ഷൂ റാക്കിനുള്ളില്‍ സൂക്ഷിക്കാറുള്ള താക്കോല്‍ ഉപയോഗിച്ച് ഇയാള്‍ വീടിനുള്ളില്‍ കടന്നു.

ആക്രമണവും പീഡനവും

ഐഐടി ബിരുദധാരിയും യുപിഎസ് സി (UPSC) പരീക്ഷയ്ക്ക് തയ്യാറെടുക്കുകയുമായിരുന്ന 22-കാരി ടെറസിലെ പഠനമുറിയില്‍ തനിച്ചായിരുന്നു. അവിടെയെത്തിയ മീണ പെണ്‍കുട്ടിയെ കീഴ്‌പ്പെടുത്താന്‍ ശ്രമിച്ചു. പെണ്‍കുട്ടി ശക്തമായി പ്രതിരോധിച്ചതോടെ മുറിയിലുണ്ടായിരുന്ന വിളക്കും മറ്റ് കനത്ത വസ്തുക്കളും ഉപയോഗിച്ച് ഇയാള്‍ പെണ്‍കുട്ടിയെ ക്രൂരമായി മര്‍ദ്ദിച്ച് അബോധാവസ്ഥയിലാക്കി. തുടര്‍ന്ന് അബോധാവസ്ഥയിലായ പെണ്‍കുട്ടിയെ ഇയാള്‍ ബലാല്‍സംഗം ചെയ്യുകയായിരുന്നു.

കൊള്ളയടിക്കാന്‍ ശ്രമം

ഓണ്‍ലൈന്‍ ഗെയിമിംഗിന് അടിമയായ മീണയുടെ ലക്ഷ്യം പണവും സ്വര്‍ണ്ണവുമായിരുന്നു. എന്നാല്‍ വീട്ടിലെ ലോക്കര്‍ ബയോമെട്രിക് (വിരലടയാളം) സംവിധാനമുള്ളതായിരുന്നു. അബോധാവസ്ഥയിലായിരുന്ന പെണ്‍കുട്ടിയെ പടികളിലൂടെ വലിച്ചിഴച്ച് ലോക്കറിന് സമീപമെത്തിച്ച ഇയാള്‍, രക്തം പുരണ്ട പെണ്‍കുട്ടിയുടെ വിരല്‍ സ്‌കാനറില്‍ അമര്‍ത്തി. എന്നാല്‍ ലോക്കര്‍ തുറന്നില്ല. അപ്പോഴേക്കും പെണ്‍കുട്ടി മരിച്ചിരിക്കാം എന്നാണ് പോലീസ് കരുതുന്നത്. പിന്നീട് സ്‌ക്രൂഡ്രൈവര്‍ ഉപയോഗിച്ച് ലോക്കര്‍ തകര്‍ത്താണ് ഇയാള്‍ സ്വര്‍ണ്ണവും പണവും കവര്‍ന്നത്.

രക്ഷപ്പെടുന്നതിന് മുന്‍പ് രക്തം പുരണ്ട വസ്ത്രങ്ങള്‍ മാറി പെണ്‍കുട്ടിയുടെ സഹോദരന്റെ വസ്ത്രം ധരിക്കാനും ഇയാള്‍ മറന്നില്ല. ദ്വാരകയിലെ ഒരു ഹോട്ടലില്‍ ഒളിവില്‍ കഴിയുകയായിരുന്ന മീണയെ പോലീസ് പിടികൂടി.

ഓണ്‍ലൈന്‍ ഗെയിം അഡിക്ഷനും സ്വഭാവദൂഷ്യവും

‘ടീന്‍ പട്ടി’ എന്ന ഓണ്‍ലൈന്‍ ഗെയിമിന് മീണ തീവ്രമായി അടിമയായിരുന്നുവെന്ന് പോലീസ് പറഞ്ഞു. ഇതില്‍ പണം നഷ്ടപ്പെട്ടതിനെ തുടര്‍ന്ന് സമീപത്തെ വീടുകളിലെ മറ്റ് ജീവനക്കാരില്‍ നിന്ന് ഇയാള്‍ സ്ഥിരമായി പണം കടം വാങ്ങിയിരുന്നു. ഈ സ്വഭാവദൂഷ്യം കാരണമാണ് എട്ട് മാസം മുന്‍പ് ഇയാളെ ജോലിയില്‍ നിന്ന് പിരിച്ചുവിട്ടത്.

മരിച്ച പെണ്‍കുട്ടി പഠനത്തില്‍ അസാമാന്യ പ്രതിഭയായിരുന്നു. പ്ലസ് ടു പരീക്ഷയില്‍ അഖിലേന്ത്യാ തലത്തില്‍ ടോപ്പറായിരുന്ന ഇവര്‍ ഐഐടി ഡല്‍ഹിയില്‍ നിന്നാണ് ബിരുദം പൂര്‍ത്തിയാക്കിയത്. സിവില്‍ സര്‍വീസ് ലക്ഷ്യമിട്ട് കഠിനമായ പഠനത്തിലായിരുന്നു. ഒരു മികച്ച നര്‍ത്തകി കൂടിയായ പെണ്‍കുട്ടി നിരവധി പുരസ്‌കാരങ്ങളും നേടിയിട്ടുണ്ട്.

രാവിലെ നേരത്തെ എഴുന്നേറ്റ് പഠിക്കാന്‍ മാതാപിതാക്കള്‍ നല്‍കിയ നിര്‍ദ്ദേശം അനുസരിച്ച് പുതിയ ദിനചര്യ ആരംഭിച്ച ആദ്യ ദിനത്തിലാണ് പെണ്‍കുട്ടിക്ക് ഈ ദുരന്തം സംഭവിച്ചത് എന്നത് ആ കുടുംബത്തിന്റെ വേദന വര്‍ദ്ധിപ്പിക്കുന്നു. പ്രതിക്കെതിരെ കൊലപാതകം, ബലാത്സംഗം, കവര്‍ച്ച എന്നീ കുറ്റങ്ങള്‍ ചുമത്തി കേസ് രജിസ്റ്റര്‍ ചെയ്തു.