ട്രമ്പിനെ ധിക്കരിക്കാന്‍ ആഹ്വാനം; കൊളംബിയന്‍ പ്രസിഡന്റിന്റെ വിസ പിന്‍വലിച്ച് അമേരിക്ക

കൊളംബിയന്‍ പ്രസിഡന്റ് ഗുസ്താവോ പെട്രോയുടെ വിസ റദ്ദാക്കുമെന്ന് യുണൈറ്റഡ് സ്റ്റേറ്റ്‌സ് ഡിപ്പാര്‍ട്ട്മെന്റ് ഓഫ് സ്റ്റേറ്റ് അറിയിച്ചു. ന്യൂയോര്‍ക്ക് സിറ്റിയില്‍ ഐക്യരാഷ്ട്രസഭയുടെ ആസ്ഥാനത്തിന് പുറത്ത് പ്രതിഷേധക്കാരോട് നടത്തിയ പ്രസംഗവുമായി ബന്ധപ്പെട്ട് അദ്ദേഹത്തിന്റെ ‘അശ്രദ്ധവും പ്രകോപനപരവുമായ നടപടികള്‍’ ചൂണ്ടിക്കാട്ടിയാണ് ഈ തീരുമാനം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

‘കൊളംബിയന്‍ പ്രസിഡന്റ് ധഗുസ്താവോ പെട്രോ ന്യൂയോര്‍ക്ക് സിറ്റിയിലെ ഒരു തെരുവില്‍ നിന്ന് യുഎസ് സൈനികരോട് ഉത്തരവുകള്‍ അനുസരിക്കരുതെന്ന് ആവശ്യപ്പെടുകയും അക്രമത്തിന് പ്രേരിപ്പിക്കുകയും ചെയ്തു’ ഡിപ്പാര്‍ട്ട്മെന്റ് വെള്ളിയാഴ്ച എക്‌സില്‍ പോസ്റ്റ് ചെയ്തു.

പെട്രോയുടെ മേല്‍ ആരോപിക്കപ്പെടുന്ന കുറ്റകൃത്യത്തെക്കുറിച്ച് പോസ്റ്റില്‍ കൂടുതല്‍ വിവരങ്ങളില്ലെങ്കിലും, സോഷ്യല്‍ മീഡിയയില്‍ പ്രചരിക്കുന്ന ദൃശ്യങ്ങളില്‍, മിഡ്ടൗണ്‍ മാന്‍ഹട്ടനിലെ യുഎന്‍ കെട്ടിടത്തിന് പുറത്ത് പലസ്തീന്‍ അനുകൂലികളായ ആയിരക്കണക്കിന് പ്രതിഷേധക്കാര്‍ക്കൊപ്പം കൊളംബിയന്‍ നേതാവ് പങ്കെടുക്കുന്നത് കാണിക്കുന്നുണ്ട്.

ഒരു വീഡിയോ ക്ലിപ്പില്‍, ലോകരക്ഷയ്ക്കായി ഒരു ‘സേനയെ’ സ്ഥാപിക്കുന്നതിനുള്ള പ്രമേയം യുഎന്‍-ന് മുന്‍പാകെ അവതരിപ്പിക്കാന്‍ തന്റെ രാജ്യം പദ്ധതിയിടുന്നതായി പെട്രോ പറയുന്നത് കേള്‍ക്കാം. ഈ സേനയുടെ ആദ്യ ദൗത്യം ‘പലസ്തീനെ മോചിപ്പിക്കുക’ എന്നതായിരിക്കും എന്നും അദ്ദേഹം പറയുന്നു.

ALSO READ: ഐക്യരാഷ്ട്രസഭയിലെ നെതന്യാഹുവിന്റെ പ്രസംഗം ബഹിഷ്‌കരിച്ച് നിരവധി രാജ്യങ്ങള്‍

ഈ സേനയിലേക്ക് ലോക രാജ്യങ്ങള്‍ സൈനികരെ സംഭാവന ചെയ്യുമെന്നും, അത് അന്താരാഷ്ട്ര നീതിന്യായ കോടതിയുടെ ഉത്തരവുകള്‍ നടപ്പാക്കുമെന്നും യുഎസ് സൈന്യത്തേക്കാള്‍ വലുതായിരിക്കണം ഈ സൈന്യമെന്നും പെട്രോ പറഞ്ഞു.

‘യുഎസ് സൈന്യത്തിലെ എല്ലാ സൈനികരോടും ഞാന്‍ ആവശ്യപ്പെടുന്നത്, നിങ്ങളുടെ തോക്കുകള്‍ മനുഷ്യരാശിക്ക് നേരെ ചൂണ്ടരുത്. ട്രംപിന്റെ ഉത്തരവുകള്‍ ധിക്കരിക്കുക. മനുഷ്യരാശിയുടെ ഉത്തരവുകള്‍ അനുസരിക്കുക,’ കൊളംബിയന്‍ നേതാവ് പറഞ്ഞു.

വിസ റദ്ദാക്കലിനെക്കുറിച്ച് പെട്രോയുടെ ഓഫീസും കൊളംബിയയുടെ വിദേശകാര്യ മന്ത്രാലയവും ഇതുവരെ പ്രതികരിച്ചിട്ടില്ല.

ചൊവ്വാഴ്ച യുഎന്‍ പൊതുസഭയില്‍ നടത്തിയ പ്രസംഗത്തിലും പെട്രോ യുഎസ് പ്രസിഡന്റ് ഡൊണാള്‍ഡ് ട്രംപിനെ വിമര്‍ശിച്ചിരുന്നു. യുഎസ് പ്രസിഡന്റ് ഗസയിലെ ‘വംശഹത്യയില്‍ പങ്കാളിയാണ്’ എന്ന് പറഞ്ഞ അദ്ദേഹം, മയക്കുമരുന്ന് കടത്ത് ആരോപിച്ച് കരീബിയന്‍ കടലിലെ ബോട്ടുകള്‍ക്ക് നേരെ യുഎസ് നടത്തിയ വ്യോമാക്രമണങ്ങളെക്കുറിച്ച് വിചാരണാ നടപടികള്‍ ആവശ്യപ്പെടുകയും ചെയ്തിരുന്നു.

വെള്ളിയാഴ്ച പെട്രോയുടെ സോഷ്യല്‍ മീഡിയ പ്രൊഫൈലില്‍, ന്യൂയോര്‍ക്കിലെ പലസ്തീന്‍ അനുകൂല പ്രതിഷേധക്കാരോട് താന്‍ സംസാരിക്കുന്നതിന്റെ നിരവധി വീഡിയോ ക്ലിപ്പുകള്‍ അദ്ദേഹം റീപോസ്റ്റ് ചെയ്തിട്ടുണ്ട്.

‘പലസ്തീന്‍ സ്വതന്ത്രമാകട്ടെ. ഗസ വീണാല്‍ മനുഷ്യരാശി മരിക്കും,’ ഒരു പോസ്റ്റില്‍ പെട്രോ പറഞ്ഞു.

2022-ല്‍ അധികാരത്തിലെത്തിയ ഈ ഇടതുപക്ഷ നേതാവ്, ഇസ്രായേല്‍ ഗസയില്‍ നടത്തുന്ന ആക്രമണത്തിന്റെ കടുത്ത വിമര്‍ശകനാണ്. അതിനെ അദ്ദേഹം ആവര്‍ത്തിച്ച് ‘വംശഹത്യ’ എന്ന് അപലപിച്ചിട്ടുണ്ട്.

ഗസയിലെ ഇസ്രായേലിന്റെ ‘വംശഹത്യാപരമായ’ സര്‍ക്കാരിന്റെ നടപടികള്‍, പലസ്തീന്‍ സഹായം തേടുന്നവര്‍ക്ക് നേരെ നടത്തിയ ആക്രമണങ്ങള്‍ ഉള്‍പ്പെടെയുള്ളവ ഹോളോകോസ്റ്റിനെ ഓര്‍മ്മിപ്പിക്കുന്നു എന്ന് ചൂണ്ടിക്കാട്ടി 2024-ല്‍ പെട്രോ ഇസ്രായേലുമായുള്ള നയതന്ത്ര ബന്ധം വിച്ഛേദിച്ചു.
ജൂലൈയില്‍, ഇസ്രായേലിലേക്കുള്ള കല്‍ക്കരി കയറ്റുമതിക്ക് അദ്ദേഹം പൂര്‍ണ്ണമായ നിരോധനം വീണ്ടും ഏര്‍പ്പെടുത്തി, ഇസ്രായേലിന്റെ വംശഹത്യയില്‍ കൊളംബിയ ‘പങ്കാളിയാകില്ല’ എന്നും അദ്ദേഹം പറഞ്ഞു.