കൂടാളിയില്‍ കാര്‍ മരത്തിലിടിച്ച് നാല് മരണം; അപകടത്തില്‍ പെട്ടത് വിവാഹത്തില്‍ പങ്കെടുക്കാന്‍ എത്തിയവര്‍

കണ്ണൂര്‍ മട്ടന്നൂരിനടുത്ത് കൂടാളി കുംഭത്ത് നിയന്ത്രണംവിട്ട കാര്‍ മരത്തിലിടിച്ച് നാലുപേര്‍ മരിച്ചു. ഒരാള്‍ക്ക് ഗുരുതര പരുക്കേറ്റു. കണ്ണൂര്‍ ചാലോടിന് സമീപം ഇന്നലെ രാത്രി 11.30 ഓടെയാണ് സംഭവം. കാറിലുണ്ടായിരുന്ന അഞ്ച് പേരില്‍ ഗുരുതരമായി പരിക്കേറ്റ ഒരാളെ കണ്ണൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഉത്തര്‍പ്രദേശ് സ്വദേശികളായ പരം ചേത്രി, ഹര്‍ഷ്, മലയാളികളായ റിസ്വാന്‍, ഷാന്‍ എന്നിവരാണ് മരിച്ചത്. ബെംഗളൂരുവില്‍ നിന്നും കണ്ണൂരിലേക്കുള്ള യാത്രയ്ക്കിടെ ഇവര്‍ സഞ്ചരിച്ച വാഹനം അപകടത്തില്‍പ്പെടുകയായിരുന്നു. അലവില്‍ സ്വദേശി ഷാന്‍ സുഹൃത്തുക്കളോടൊപ്പം വിവാഹത്തില്‍ പങ്കെടുക്കാന്‍ ബെംഗളൂരുവില്‍ നിന്നു വരുന്നതിനിടെയാണ് അപകടത്തില്‍പെട്ടത്.

ഒരാള്‍ അപകടസ്ഥലത്തുതന്നെ മരിച്ചു. മൃതദേഹം ജില്ലാ ആശുപത്രിയില്‍ സൂക്ഷിച്ചിരിക്കുകയാണ്. മൂന്നുപേരെ ചാലയിലെ സ്വകാര്യാശുപത്രിയില്‍ എത്തിച്ചെങ്കിലും രക്ഷിക്കാനായില്ല. കൂടുതല്‍ വിവരങ്ങള്‍ അറിവായിട്ടില്ല. ഡ്രൈവര്‍ ഉറങ്ങി പോയതാകാം അപകടകാരണമെന്നു സംശയിക്കുന്നു.

വഴിയരികിലെ തണല്‍മരത്തിലിടിച്ചാണ് അപകടം. കാര്‍ പൂര്‍ണമായും തകര്‍ന്നു. കാറില്‍ അകപ്പെട്ട യാത്രക്കാരെ ഏറെ പ്രയത്‌നിച്ചാണ് പുറത്തെടുത്തത്. അപകടശബ്ദം കേട്ടെത്തിയ പരിസരവാസികളാണ് ആദ്യം രക്ഷാപ്രവര്‍ത്തനം നടത്തിയത്. മട്ടന്നൂര്‍ പൊലീസും അഗ്‌നിരക്ഷാസേനയും സ്ഥലത്തെത്തിയിരുന്നു.

ALSO READ: പൂര്‍ണ്ണ തോതിലുള്ള യുദ്ധത്തിന് തയ്യാറെന്ന് ഇറാന്‍; ഖത്തര്‍ പ്രതിനിധികള്‍ ടെഹ്റാനില്‍

അമിതവേഗത്തിലായിരുന്ന കാര്‍ നിയന്ത്രണം നഷ്ടപ്പെട്ട് റോഡരികിലെ മരത്തിലേക്ക് ഇടിച്ചുകയറിയാണ് അപകടമുണ്ടായതെന്നാണ് പ്രാഥമിക നിഗമനം.

രക്ഷാപ്രവര്‍ത്തനം ദുഷ്‌കരം

ഫയര്‍ഫോഴ്‌സ് ഉദ്യോഗസ്ഥര്‍ എത്തി കാര്‍ വെട്ടിപ്പൊളിച്ചാണ് അപകടത്തില്‍പ്പെട്ട അഞ്ച് പേരെയും പുറത്തെടുത്തത്. ഉടന്‍ തന്നെ ഇവരെ ആശുപത്രിയിലേക്ക് മാറ്റിയെങ്കിലും നാല് പേരുടെ ജീവന്‍ രക്ഷിക്കാനായില്ല. ഗുരുതരമായി പരിക്കേറ്റ അഞ്ചാമത്തെയാളെ കണ്ണൂരിലെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്.

അപകടവിവരം അറിഞ്ഞ് മരിച്ചവരുടെ ബന്ധുക്കള്‍ കണ്ണൂരിലേക്ക് തിരിച്ചിട്ടുണ്ട്. പോസ്റ്റ്മോര്‍ട്ടം നടപടികള്‍ക്ക് ശേഷം മൃതദേഹങ്ങള്‍ നാട്ടിലേക്ക് കൊണ്ടുപോകും. ഇതിനായുള്ള ക്രമീകരണങ്ങള്‍ ജില്ലാ ഭരണകൂടത്തിന്റെയും പൊലീസിന്റെയും നേതൃത്വത്തില്‍ പുരോഗമിക്കുകയാണ്. ദീര്‍ഘദൂര യാത്രയായതിനാല്‍ ഡ്രൈവര്‍ക്ക് ക്ഷീണം അനുഭവപ്പെട്ടിരുന്നോ എന്ന കാര്യവും പൊലീസ് പരിശോധിക്കുന്നുണ്ട്. അപകടത്തില്‍പ്പെട്ട വാഹനം പിന്നീട് ക്രെയിന്‍ ഉപയോഗിച്ച് റോഡരികില്‍ നിന്ന് മാറ്റി ഗതാഗതം പൂര്‍ണ്ണമായും പുനഃസ്ഥാപിച്ചു.

രാത്രികാലങ്ങളില്‍ ഈ മേഖലയില്‍ വാഹനങ്ങള്‍ അമിതവേഗത്തില്‍ സഞ്ചരിക്കുന്നത് പതിവാണെന്ന് നാട്ടുകാര്‍ പറയുന്നു. വെളിച്ചക്കുറവും റോഡിന്റെ പ്രത്യേകതകളും പലപ്പോഴും അപകടങ്ങള്‍ക്ക് കാരണമാകാറുണ്ട്.

Kannur koodali car accident four death