ബെം​ഗളുരു ഈദ്​ഗാഹ് മൈതാനം ​ഗണേശോത്സവത്തിന് നൽകാൻ കർണാടക സർക്കാർ

ബെം​ഗളുരു ചാമരാജ്പേട്ടയിലെ ഈ​ദ്​ഗാഹ് മൈതാനം ​ഗണേശോത്സവം (വിനായക ചതുർഥി ആഘോഷം) നടത്താനായി അനുമതി നൽകാനൊരുങ്ങി സംസ്ഥാന ബിജെപി സർക്കാർ. മൈതാനത്തിൽ എല്ലാ മത-സാംസ്കാരിക പരിപാടികളും നടത്താൻ ഹൈക്കോടതി ഉത്തരവിട്ട സാഹചര്യത്തിലാണ് നീക്കം. ഈ മാസം 31നാണ് വിനായക ചതുർഥി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

വഖഫ് ബോർഡും ന​ഗര ഭരണകൂടമായ ബൃഹത് ബെം​ഗളുരു മഹാന​ഗര പാലികെ (ബി.ബി.എം.പി)യും തമ്മിൽ തർ‍ക്കത്തിലായിരുന്ന ഈദ് ​ഗാഹ് മൈതാനം ഈ മാസം ആദ്യം റവന്യു വകുപ്പ് ഏറ്റെടുത്തിരുന്നു.

തുടർന്നാണ് ഹൈക്കോടതി ഉത്തരവുണ്ടായത്. തങ്ങളുടെ മതപരിപാടികൾ ഈദ്​ഗാഹ് മൈതാനത്തിൽ നടത്താൻ അനുവദിക്കണമെന്ന് ആവശ്യപ്പെട്ട് ഹിന്ദുത്വ സംഘടനകൾ രം​ഗത്തെത്തിയിരുന്നു.

ഇതോടെ വിഷയത്തിൽ ഇടപെട്ട ഹൈക്കോടതി, എല്ലാവിധ മത-സാസ്കാരിക പരിപാടികളും ഈദ്​ഗാഹ് മൈതാനത്തിൽ നടത്താൻ സംസ്ഥാന സർക്കാരിന് അനുമതി നൽകാമെന്ന് വെള്ളിയാഴ്ച ഉത്തരവിടുകയായിരുന്നു. ആ​ഗസ്റ്റ് 31മുതൽ ആയിരിക്കണം ഇതന്നും കോടതി നിർദേശിച്ചു.

ഇതുപ്രകാരമാണ് അന്നേദിവസം നടക്കാനിരിക്കുന്ന ​ഗണേശോത്സവത്തിന് ഈദ്​ഗാഹ് മൈതാനത്തിൽ അനുമതി നൽകാൻ ബസവരാജ് ബൊമ്മൈയുടെ നേതൃത്വത്തിലുള്ള ബിജെപി സർക്കാർ ഒരുങ്ങുന്നത്.