പിഡിപി നേതാവ് നിസാര്‍ മേത്തറെ പാര്‍ട്ടിയില്‍ നിന്ന് പുറത്താക്കി

കൊച്ചി: ചെയര്‍മാന്‍ മഅ്ദനിയുടെ ആരോഗ്യവിവരങ്ങള്‍ ചോദിച്ചറിയാന്‍ ബന്ധപ്പെട്ട മാദ്ധ്യമപ്രവര്‍ത്തകയ്ക്ക് നിരന്തരം അശ്ലീല സന്ദേശങ്ങള്‍ അയച്ച പിഡിപി നേതാവിനെ പാര്‍ട്ടിയുടെ പ്രാഥമിക അംഗത്വത്തില്‍ നിന്ന് പുറത്താക്കി. സംസ്ഥാന ജനറല്‍ സെക്രട്ടറി നിസാര്‍ മേത്തറിനെതിരെയാണ് നടപടി. ചെയര്‍മാന്‍ അബ്ദുന്നാസിര്‍ മഅ്ദനിയുടെ അനുമതിയോടെ പുറത്താക്കിയതായി സംഘടനാകാര്യ ജനറല്‍ സെക്രട്ടറി വി എം അലിയാര്‍ അറിയിച്ചു.
കൊച്ചിയില്‍ നിന്നുള്ള മാദ്ധ്യമപ്രവര്‍ത്തകയെ വാട്ട്സാപ്പ് വഴി നിരന്തരം ശല്യം ചെയ്തതിന് നിസാര്‍ മേത്തറെ പിഡിപി നേതൃത്വം നേരത്തെ സസ്പെന്‍ഡ് ചെയ്തിരുന്നു. മാദ്ധ്യമപ്രവര്‍ത്തകയുടെ പരാതിയില്‍ കടവന്ത്ര പൊലീസ് കേസെടുത്ത് അന്വേഷണം ആരംഭിച്ചിരുന്നു. കേരള സന്ദര്‍ശന വേളയില്‍ ആശുപത്രിയിലായ പി ഡി പി ചെയര്‍മാന്‍ മഅ്ദനിയുടെ ആരോഗ്യനില മാദ്ധ്യമങ്ങളെ അറിയിക്കാന്‍ ചുമതലപ്പെടുത്തിയിരുന്നത് നിസാര്‍ മേത്തറെയാണ്. മഅ്ദനിയുടെ ആരോഗ്യവിവരങ്ങള്‍ ചോദിച്ചറിയാന്‍ നിസാറുമായി മാദ്ധ്യമപ്രവര്‍ത്തക ബന്ധപ്പെട്ടു. ഇതിന് പിന്നാലെയാണ് അശ്ലീല സന്ദേശങ്ങള്‍ അയച്ചുതുടങ്ങിയത്. മാദ്ധ്യമപ്രവര്‍ത്തക താക്കീത് നല്‍കിയെങ്കിലും സന്ദേശങ്ങള്‍ അയയ്ക്കുന്നത് തുടര്‍ന്നു. ഇതോടെയാണ് പരാതി നല്‍കിയത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>