ബിജെപി വിരുദ്ധ ചേരിക്ക് നേതൃത്വം നല്‍കുന്ന മുന്നണിയെ വിജയിപ്പിക്കണം: മൂവാറ്റുപുഴ അഷ്‌റഫ് മൗലവി

കൊച്ചി: ബിജെപി വിരുദ്ധ ചേരിക്ക് നേതൃത്വം നല്‍കുന്ന പാര്‍ട്ടിയെയും മുന്നണിയെയും വോട്ട് നല്‍കി വിജയിപ്പിക്കണമെന്ന് എസ്ഡിപിഐ സംസ്ഥാന പ്രസിഡന്റ് മൂവാറ്റുപുഴ അഷ്റഫ് മൗലവി. ഭരണഘടനാനുസൃതമായി രാജ്യം നിലനില്‍ക്കണോ എന്നു തീരുമാനിക്കപ്പെടുന്ന തിരഞ്ഞെടുപ്പാണിതെന്നും രാജ്യത്തിന്റെ വീണ്ടെടുപ്പാണ് മുഖ്യ അജണ്ടയെന്നും അദ്ദേഹം പറഞ്ഞു. ( The front leading the anti-BJP side must win: Moovattupuzha Ashraf Moulavi )

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

‘രാജ്യത്തിന്റെ മതനിരപേക്ഷതയും മതസൗഹാര്‍ദവും തകര്‍ക്കുന്ന പ്രഖ്യാപനങ്ങളാണ് പ്രധാനമന്ത്രി അടക്കമുള്ളവരുടെ ഭാഗത്തുനിന്ന് നിരന്തരം വമിക്കുന്നത്. ബിജെപിക്ക് മൂന്നാമൂഴം ലഭിക്കുന്നപക്ഷം രാജ്യം എങ്ങോട്ട് ചലിക്കും എന്നതിന്റെ ദുസ്സൂചനകളാണ് പ്രധാനമന്ത്രിയില്‍ നിന്നും യോഗി ആദിത്യനാഥില്‍ നിന്നും ആവര്‍ത്തിക്കുന്നത്. കേന്ദ്ര സര്‍ക്കാരിനെതിരേ ഉയര്‍ന്നുവരുന്ന ഭരണവിരുദ്ധ വികാരത്തെ മറികടക്കാന്‍ ഭരണഘടനാ ഉത്തരവാദിത്വമുള്ളവര്‍ വംശീയത പ്രചരിപ്പിക്കുകയാണ്.

രാജ്യത്തിന്റെ സര്‍വ്വ മൂല്യങ്ങളും തച്ചു തകര്‍ക്കപ്പെട്ട പത്തു വര്‍ഷത്തെ ഭരണമാണ് കഴിഞ്ഞുപോയത്. ബിജെപി ഭരണത്തില്‍ രാജ്യത്തിന്റെ പൊതുകടം ഗണ്യമായി വര്‍ധിച്ചിരിക്കുന്നു. മോദി ഭരണം പത്തുവര്‍ഷം പൂര്‍ത്തിയാക്കുന്ന 2024 ല്‍ പൊതുകടം 5.92 ലക്ഷം കോടിയില്‍ നിന്ന് 16 ലക്ഷം കോടിയായി വര്‍ധിച്ചിരിക്കുകയാണ്. തൊഴില്‍ രാഹിത്യവും നിയമന നിരോധനവും രാജ്യത്ത് നിലനില്‍ക്കുന്നു.

പണപ്പെരുപ്പം, വിലക്കയറ്റം തുടങ്ങിയ ഗുരുതരമായ പ്രതിസന്ധിയാണ് പൗരസമൂഹം നേരിടുന്നത്. സാമ്പത്തിക അസമത്വം നാള്‍ക്കുനാള്‍ വര്‍ധിക്കുന്നു. വിവിധ മതവിഭാഗങ്ങള്‍ തമ്മില്‍ സൗഹൃദവും പൗരന്മാര്‍ക്ക് സുരക്ഷിതത്വവും ഉണ്ടാകാന്‍ ബിജെപി വിരുദ്ധ സര്‍ക്കാര്‍ അധികാരത്തില്‍ വരേണ്ടതുണ്ട്. ഈ സാഹചര്യത്തില്‍ ജനാധിപത്യത്തിലെ ഏറ്റവും ശക്തമായ വോട്ടവകാശം രാജ്യരക്ഷയ്ക്കായി വിനിയോഗിക്കണമെന്നും അഷ്‌റഫ് മൗലവി അഭ്യര്‍ഥിച്ചു.