കേരളത്തില്‍ ഭരണ മാറ്റമുണ്ടാവുമോ? തിരഞ്ഞെടുപ്പ് ഫലത്തില്‍ ശൈലജ ടീച്ചറുടെ റോളെന്ത്? അഭിപ്രായ സര്‍വേ പറയുന്നത് ഇങ്ങനെ

ന്യൂഡല്‍ഹി: കേരളത്തില്‍ ഇപ്പോള്‍ ലോക്സഭാ തിരഞ്ഞെടുപ്പ് നടത്തിയാല്‍ യുഡിഎഫ് തങ്ങളുടെ ആധിപത്യം നിലനിര്‍ത്തും എന്ന് ഇന്ത്യാ ടുഡേ-സി വോട്ടര്‍ മൂഡ് ഓഫ് ദി നേഷന്‍ അഭിപ്രായ സര്‍വേ.  (Will there be a change of government in Kerala? India Today-C Voter survey)  2024ലേത് പോലെ ആകെയുള്ള 20 സീറ്റില്‍ 18 യുഡിഎഫ് നേടും.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ബാക്കിയുള്ള ഓരോ സീറ്റിലും എല്‍ഡിഎഫും എന്‍ഡിഎയും വിജയിക്കും എന്നും സര്‍വേ പറയുന്നു. അതേസമയം, ബിജെപിയുടെ വോട്ടുവിഹിതത്തില്‍ വലിയ വര്‍ധനവുണ്ടാവുമെന്ന ശ്രദ്ധേയമായ നിരീക്ഷണവും സര്‍വേയിലുണ്ട്.

പരമ്പരാഗതമായി ദ്വികക്ഷി രാഷ്ട്രീയം നിലനില്‍ക്കുന്ന കേരളത്തില്‍ മൂന്നാം ബദലായി ബിജെപി ഉയര്‍ന്ന് വരികയാണ് എന്നാണ് അഭിപ്രായ സര്‍വേയുടെ വിലയിരുത്തല്‍. എല്‍ഡിഎഫിന്റെ വോട്ടുവിഹിതത്തില്‍ ഇടിവ് ഉണ്ടാകും.

2024 ലെ ലോക്സഭാ തിരഞ്ഞെടുപ്പില്‍ ബിജെപിക്ക് ലഭിച്ചത് 17 ശതമാനം വോട്ടായിരുന്നു. ഇത് 24 ശതമാനത്തിലേക്കെത്തും. എല്‍ഡിഎഫിന് 32 ശതമാനം വോട്ടായിരുന്നു ആറ് മാസം മുന്‍പ് നടന്ന തിരഞ്ഞെടുപ്പില്‍ ലഭിച്ചത് എങ്കില്‍ ഇത് രണ്ട് ശതമാനം കുറഞ്ഞ് 30 ശതമാനത്തില്‍ എത്തും. യുഡിഎഫിന് ലഭിച്ച 43 ശതമാനം വോട്ട് ഒരു ശതമാനം കുറഞ്ഞ് 42 ശതമാനത്തിലും എത്തും.

ALSO READ: കേരളത്തിലെ 11 രാഷ്ട്രീയ നേതാക്കള്‍ അഭിനയിക്കുന്ന ‘കേപ്ടൗണ്‍’ തിയേറ്ററിലേക്ക്

അതേസമയം, നിയമസഭയിലെ കണക്ക് വ്യത്യസ്ഥമാകുമെന്നാണ് സര്‍വേ വിശകലനം ചെയ്ത രാഷ്ട്രീയ വിദഗ്ധരുടെ നിരീക്ഷണം. നിയമസഭയില്‍ ഇടതുപക്ഷത്തിന് കാര്യമായ കോട്ടമുണ്ടാവില്ല.

2026 ലെ നിയമസഭാ തിരഞ്ഞെടുപ്പില്‍ ആര് വിജയിക്കുമെന്ന് ആര്‍ക്കും ഊഹിക്കാവുന്നതേയുള്ളൂവെന്ന് സെന്റര്‍ ഫോര്‍ പോളിസി റിസര്‍ച്ചിലെ രാഹുല്‍ വര്‍മ്മ ഇന്ത്യാ ടുഡേയോട് പറഞ്ഞു.

കഴിഞ്ഞ നിയമസഭാ തിരഞ്ഞെടുപ്പുകളില്‍ ഇടതുപക്ഷം തങ്ങളുടെ സ്ഥാനം നിലനിര്‍ത്തിയപ്പോള്‍. ലോക്‌സഭയില്‍ കോണ്‍ഗ്രസ് പാര്‍ട്ടി താരതമ്യേന മികച്ച പ്രകടനം കാഴ്ചവച്ച ചുരുക്കം ചില സംസ്ഥാനങ്ങളില്‍ ഒന്നാണ് കേരളം എന്നും അദ്ദേഹം ചൂണ്ടിക്കാട്ടി. ഇടതുപക്ഷത്തെ ഒരു ദേശീയ ഘടകമായി ജനങ്ങള്‍ കാണാത്തതുകൊണ്ടാണ് ഈ വിഭജനം സംഭവിക്കുന്നതെന്നും അദ്ദേഹം പറഞ്ഞു.

കേരളത്തിലെ വോട്ടിംഗ് പാറ്റേണ്‍ ഒരു മാറ്റത്തിലായിരുന്നുവെങ്കിലും അത് നിയന്ത്രിക്കപ്പെട്ടുവെന്നും ഇപ്പോഴും ഇടതുപക്ഷത്തിന് അനുകൂലമാണെന്നും രാഷ്ട്രീയ വിശകലന വിദഗ്ദ്ധ മനീഷ പ്രിയം അഭിപ്രായപ്പെട്ടു. കോണ്‍ഗ്രസ് കേഡര്‍ ദുര്‍ബലമാണെന്നാണ് സംസ്ഥാനത്തെ വോട്ടര്‍മാര്‍ വിശ്വസിക്കുന്നത്.

ഇടതുപക്ഷം ഇപ്പോഴും ശക്തമാണ്. കേന്ദ്രത്തിലെ കോണ്‍ഗ്രസിന്റെ മോശം പ്രകടനം സംസ്ഥാനത്ത് അതിന്റെ സാധ്യതകളെ ദോഷകരമായി ബാധിക്കുകയായിരുന്നു എന്നും പ്രിയം പറഞ്ഞു.

ശൈലജ ടീച്ചറെ മുഖ്യമന്ത്രി സ്ഥാനാര്‍ത്ഥിയായി ഉയര്‍ത്തിക്കാട്ടുകയാണെങ്കില്‍ ലോക്സഭാ തിരഞ്ഞെടുപ്പില്‍ അകന്നുപോയ സ്ത്രീ, ഒബിസി വോട്ടര്‍മാരെ തിരിച്ചെത്തിക്കാം എന്നും അവര്‍ ചൂണ്ടിക്കാട്ടി. ഇതിലൂടെ ഇടതുപക്ഷത്തിന് മൂന്നാമതും അധികാരത്തിലെത്താനാവും.

സംസ്ഥാനത്ത് ബിജെപിയുടെ സാധ്യത തള്ളിക്കളയാനാവില്ലെന്ന് സെഫോളജിസ്റ്റും സിവോട്ടറിന്റെ സ്ഥാപക ഡയറക്ടറുമായ യശ്വന്ത് ദേശ്മുഖ് പറഞ്ഞു. ത്രിപുരയിലും പശ്ചിമ ബംഗാളിലും സംഭവിച്ച പോലെ ഇടതുപക്ഷ വോട്ടുകള്‍ ബിജെപിയിലേക്ക് മാറുന്നുവെന്നും അവര്‍ സൂചിപ്പിച്ചു.

2025 ജനുവരി 2 നും ഫെബ്രുവരി 9 നും ഇടയില്‍ എല്ലാ ലോക്‌സഭാ മണ്ഡലങ്ങളിലുമായി 125,123 വ്യക്തികളെ ഉള്‍പ്പെടുത്തിയാണ് ഇന്ത്യാ ടുഡേ-സിവോട്ടര്‍ മൂഡ് ഓഫ് ദി നേഷന്‍ സര്‍വേ നടത്തിയത്.