സന്ദീപ് വാര്യര്‍ കെപിസിസി ജനറല്‍ സെക്രട്ടറി പദവിയിലേക്ക്; ഡല്‍ഹിയില്‍ മുതിര്‍ന്ന നേതാക്കളുമായി ചര്‍ച്ച നടത്തി

ന്യൂഡല്‍ഹി: ബി.ജെ.പി വിട്ട് കോണ്‍ഗ്രസില്‍ ചേര്‍ന്ന സന്ദീപ് വാര്യര്‍ക്ക് കെ.പി.സി.സി ജനറല്‍ സെക്രട്ടറി പദവി നല്‍കാന്‍ ധാരണയായതായി റിപോര്‍ട്ട്. (Sandeep Warrier appointed as KPCC General Secretary; held discussions with senior leaders in Delhi)  കെ.പി.സി.സി പുനസംഘടനക്ക് മുന്‍പ് തീരുമാനമുണ്ടാകുമെന്നാണ് വിവരം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഡല്‍ഹിയിലെത്തിയ സന്ദീപ് എ.ഐ.സി.സി ജനറല്‍ സെക്രട്ടറി കെ.സി.വേണുഗോപാല്‍, കേരളത്തിന്റെ ചുമതലയുള്ള ജനറല്‍ സെക്രട്ടറി ദീപദാസ് മുന്‍ഷി എന്നിവരുമായി കൂടിക്കാഴ്ച നടത്തിയിരുന്നു. ഏത് പദവി തന്നാലും സ്വീകരിക്കാന്‍ തയാറാണെന്നും സജീവ പ്രവര്‍ത്തനത്തിലേക്ക് ഇറങ്ങേണ്ടതിനാല്‍ തീരുമാനം വൈകരുതെന്നും പാര്‍ട്ടി നേതൃത്വത്തെ സന്ദീപ് വാര്യര്‍ അറിയിച്ചിരുന്നു.

ബി.ജെ.പി നേതൃത്വവുമായി തെറ്റിപ്പിരിഞ്ഞ സന്ദീപ് വാര്യര്‍ പാലക്കാട് ഉപതരിഞ്ഞെടുപ്പിന് തൊട്ടടുത്ത ദിവസമാണ് കോണ്‍ഗ്രസില്‍ എത്തിയത്. പാലക്കാട്ടെ എന്‍.ഡി.എ സ്ഥാനാര്‍ത്ഥിയായിരുന്ന സി.കൃഷ്ണകുമാറിനും ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രനുമെതിരെ രൂക്ഷവിമര്‍ശനമാണ് സന്ദീപ് വാര്യര്‍ ഉന്നയിച്ചത്.

കോണ്‍ഗ്രസിലെത്തിയ സന്ദീപിന് വന്‍ സ്വീകരണമായിരുന്നു പ്രതിപക്ഷ നേതാവ് വി.ഡി സതീശനും കെ.പി.സി.സി അധ്യക്ഷന്‍ കെ.സുധാകരനും അടക്കമുള്ളവര്‍ നല്‍കിയത്. തൊട്ടടുത്ത ദിവസങ്ങളില്‍ തന്നെ പാണക്കാട് കൊടപ്പനക്കല്‍ കുടുംബത്തില്‍ ഉള്‍പ്പെടെ സന്ദര്‍ശനം നടത്തിയിരുന്നു.

ആദ്യമായി കെ.പി.സി.സി ആസ്ഥാനത്ത് എത്തിയപ്പോഴും സന്ദീപ് വാര്യര്‍ക്ക് വന്‍ സ്വീകരണമാണ് ലഭിച്ചത്. കഴിഞ്ഞ ദിവസം മുതിര്‍ന്ന കോണ്‍ഗ്രസ് നേതാവും മുന്‍ മുഖ്യമന്ത്രിയുമായ എ.കെ. ആന്റണിയെ തിരുവനന്തപുരത്തെ അദ്ദേഹത്തിന്റെ വസതിയില്‍ സന്ദര്‍ശിക്കുകയും ചെയ്തിരുന്നു.

കോണ്‍ഗ്രസില്‍ പ്രധാനപ്പെട്ട സ്ഥാനവും അടുത്ത തിരഞ്ഞെടുപ്പില്‍ വിജയിക്കുന്ന സീറ്റും വാഗ്ദാനം ചെയ്താണ് സന്ദീപ് വാര്യരെ കോണ്‍ഗ്രസില്‍ എത്തിച്ചതെന്നാണ് വിവരം.