പുതിയൊരു അധ്യയന വര്‍ഷം കൂടി; വിദ്യാലയ മുറ്റങ്ങളില്‍ ഇന്ന് വീണ്ടും കളിചിരികളുയരും

തിരുവനന്തപുരം: രണ്ട് മാസം നീണ്ട മധ്യവേനലവധിക്കുശേഷം സംസ്ഥാനത്തെ സ്‌കൂളുകളും കോളേജുകളും ഇന്ന് തുറക്കും. (Schools and colleges opening today ) വേനല്‍ മഴയ്ക്ക് മാറും മുമ്പെത്തിയ കാലവര്‍ഷം പല ജില്ലകളിലും ഭീഷണി സൃഷ്ടിക്കുന്നതിനിടെയാണ് കുരുന്നകള്‍ പുതിയ അധ്യയന വര്‍ഷത്തിലേക്ക് കടക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സ്‌കൂള്‍പ്രവേശനോത്സവ സംസ്ഥാനതല ഉദ്ഘാടനം എറണാകുളം എളമക്കര ഗവ. ഹയര്‍സെക്കന്‍ഡറി സ്‌കൂളില്‍ 9.30-ന് മുഖ്യമന്ത്രി പിണറായി വിജയന്‍ നിര്‍വഹിക്കും. 2,44,646 കുട്ടികളാണ് സംസ്ഥാനത്ത് ഇത്തവണ ഒന്നാംക്ലാസിലെത്തുക.

ഈയാഴ്ചയും പ്രവേശനം തുടരും. അഞ്ച്, എട്ട് ക്ലാസുകളിലും പുതുതായി കുട്ടികളെത്തുമെന്നാണ് സര്‍ക്കാരിന്റെ പ്രതീക്ഷ. ആറാം പ്രവൃത്തിദിനമായ 10-ന് അന്തിമ കണക്കെടുപ്പ് നടക്കും. സ്‌കൂള്‍ പാഠ്യപദ്ധതി പരിഷ്‌കരിച്ചതിനാല്‍ ഒന്ന്, മൂന്ന്, അഞ്ച്, ഏഴ്, ഒമ്പത് ക്ലാസുകളില്‍ പുതിയ പുസ്തകങ്ങള്‍ ഉള്ളതാണ് ഈ വര്‍ഷത്തെ പുതുമ.

ജൂലായ് ഒന്നിന് നാലുവര്‍ഷ ബിരുദത്തിലേക്കു പ്രവേശിക്കുമെന്നതാണ് ഉന്നതവിദ്യാഭ്യാസത്തിലെ പ്രത്യേകത. നാലു വര്‍ഷ ബിരുദത്തിലേക്ക് കടക്കുന്നതിന് വേണ്ടി അന്തിമ നിര്‍ദേശങ്ങള്‍ ഇനിയും യൂനിവേഴ്‌സിറ്റികളില്‍ നിന്ന് കോളജുകളിലെത്തിയിട്ടില്ല. പുതിയ ബാച്ചുകള്‍ എന്ന് തുടങ്ങാനാവുമെന്ന കാര്യത്തിലും ആശയക്കുഴപ്പം ബാക്കിയാണ്.