
പൊന്നാനി: പതിനഞ്ചും പതിനാറും നൂറ്റാണ്ടുകളില് പോര്ച്ചുഗീസ് അധിനിവേശത്തിനെതിരെയും ഇസ്ലാമിക ജീവിതത്തിന്റെ പ്രചാരണത്തിനായും തൂലികയും ജീവിതവും സമര്പ്പിച്ച സൂഫീ വര്യനും വിശ്വപ്രസിദ്ധ പണ്ഡിത ശ്രേഷ്ഠനും നവോത്ഥാന നായകനും സ്വാതന്ത്ര്യ പോരാളിയുമായിരുന്ന അശ്ശൈഖ് സൈനുദ്ദീന് മഖ്ദൂമിന്റെ 518 -ാം ആണ്ടുനേര്ച്ച ഫെബ്രുവരി 12ന് ആചരിക്കും. ചെറിയ മക്ക, മലബാറിലെ മക്ക എന്നീ സ്ഥാപപ്പേരുകളില് പ്രശസ്തമായ പൊന്നാനിയിലെ വലിയ ജുമുഅത്ത് പള്ളി കേന്ദ്രമായാണ് ആണ്ടുനേര്ച്ചയുടെ പരിപാടികള് അരങ്ങേറുക. പൊന്നാനി വലിയ ജുമുഅത്ത് പള്ളി മഖ്റയിലാണ് അശൈഖ് അവര്കള് അന്ത്യവിശ്രമം കൊള്ളുന്നത്. വലിയ ജുമുഅത്ത് പള്ളി സ്ഥാപകന് കൂടിയാണ് അദ്ദേഹം.
![]() |
|
അക്ബര് ട്രാവല്സ് സ്പോണ്സര്ഷിപ്പില് പ്രസിദ്ധീകരിച്ച പൊന്നാനി ആണ്ട്നേര്ച്ചയുടെ പോസ്റ്റര് കഴിഞ്ഞ ദിവസം പള്ളി കോമ്പൗണ്ടില് പ്രകാശനം ചെയ്തു. പൊന്നാനി മഖ്ദൂം എം പി മുത്തുക്കോയ തങ്ങള്, പള്ളിക്കമ്മിറ്റി ഭാരവാഹി വി സെയ്ദു മുഹമ്മദ് തങ്ങള്, ഇമാം അബ്ദുല്ല ബാഖവി ഇയ്യാട്, സയ്യിദ് ഫള്ല് തുറാബ് ചെറുവണ്ണൂര്, ഉമര് ശാമില് ഇര്ഫാനി ചേലേമ്പ്ര, ഉവൈസ് അദനി വിളയൂര്, കുഞ്ഞുമുഹമ്മദ്, അബ്ദുറഹീം ഹാജി, ഉസ്മാന് കാമില് സഖാഫി, കോയ ജൗഹരി, അശ്റഫ് ഹാജി സംബന്ധിച്ചു. സമൂഹ സിയാറത്ത്, ഖുര്ആന് പാരായണ പൂര്ത്തീകരണം, മൗലിദ് പാരായണം, കൂട്ടപ്രാര്ഥന, അന്നദാനം, സാംസ്കാരിക പരിപാടികള് എന്നിവ ഉള്പ്പെടുന്നതാണ് അഞ്ച് ദിവസം നീണ്ട് നില്ക്കുന്ന ആണ്ടുനേര്ച്ച.